星期日, 11月 21, 2004

雜談

幾日唔得閒寫, 因為真係好忙!

首先要講講台慶女主角, 雖然黎姿出道咁耐, 但佢演技... 究竟係咪對得住佢家族??
要提提, O岩O岩買左台慶第四輯, 黎姿個樣勁似甄楚倩!

第二樣, 阿孖有難真係好難頂!

第三, 睇左少少"我係TUNA FI", 竟然有陳穎芝掙扎拍唔拍三級片既劇情!?
(真係人生如戲~) 芝姐收尾同陶大宇拍左套"哎口也女朋友"...
不過陳穎芝我最深印象係拍"廟街豪情", 吳啟華做奸角, 咩左佢, 仲傳埋AIDS俾佢!
而男主角係江華! (呢套上年有重播)

然後講起陶前師奶殺手, 尋晚果集"幹探群英"有佢! 做綁匪!

跟住又想講, 睇TVB周刊, 竟然見潔儀姐姐跳槽無記! (佢可以做乜??)

同埋唔知乜周(證明我睇幾多??!) 訪問黎耀祥, 話佢第一封FANS信係"人在邊緣"之後..
又想講下, 因為"我本善良"都有佢! 做一個基佬. 佢仲有在一號皇庭1-3輯做單集出場的人. 4-5輯就做馮素波個仔, 譚耀文大佬 之前講"我本"姓名學, 爭個名冇提!

蔣定邦: 男兒要保家衛國?? (oh no! 原來羅樂林扮過楊過??!??!?! 唔係化!)

p.s.: 林夕詞作分享第三期已經發出
http://www.linxism.com/maillist.html

星期四, 11月 18, 2004

"我本"姓名學

今日要講一下天涯俠醫, 第一集: GIGI D 英文OK啦. 不過張家輝D 眼尾紋... -_-~
同埋.. 套劇拍到咁"說明文"FEEL既?唔使要曬肯亞景卦???? 當年"我本"在英國取景都唔係拍成咁啦?!

(冇錯! 今日既話題仍然會講"我本"!)

今日要講"我本"名字學 (當年上 tragedy in literature, Dr. Yee 都話名字係好緊要! 正如紅樓夢中, 主角名都好堪玩味! 所以當年我為個COURSE寫左暫時唯一一個劇本時, 諗名都諗左好耐!)

齊喬正: 假貨喬裝成正貨? (假爸爸 -> 真爸爸?) (假仔 -> 真仔?)
至於姓齊: 齊家? 一家齊全?

簡慧心: 追求簡單的生活, 要求心靈上的滿足

齊浩男: 除左"型"之外, 當年好興"浩x", 同是90年的"回到未嫁時", leon就叫"浩然"
浩男可能係源自男星"鄭浩南", 而後來亦有鄭ep的"陳浩南".
齊喬正改呢個名, 已經預視/示左個仔會跟佢黑社會! :D~

齊浩兒: 冇親生仔, 生個女都要叫"兒"! 可惜最後都冇埋...

石伊明: 有網友講過, 用國語讀, 即係伊失明... (臨尾有集, 伊明同浩男講話有個盲妹跟住佢...... 玩預兆??? 仲有林利同阿媽講: 死都要乜... 唔記得左係乜添, 不過真係跟住死左)

石家榮: 貪戀榮華富貴

方菱: 咁充滿稜角, 豈會甘於成為木偶???

唔可以唔講當年的偶像, KITTY 的"戴安琪" diane

見到有好多網站寫佢做 diana, 其實係 diane 先O岩! anyway, diana , diane 都係紅顏薄命! (果個人佢做左"天地豪情"的芬姐 DIANA, 又係死於非命)
可能 diane 本來係一個天使 '安琪', 可惜始終都折左翼...

高俊峰: 唔識解添. 佢咪拍左呢套劇就去拍三級戲???

最後, 要講一句, visual basic D buffer, handle 得好差!!!!

星期三, 11月 17, 2004

大結局!

今日終於我本善良大結局! 真係覺得呢個劇本的大橋好好! (不過細節有D 唔連貫!)
不愧係當年的皇牌劇. 我覺得起碼唔係果D 家族式恩怨片, 真係好唔同! 邵美琪真係好靚! 同埋, 難得D 角色好有個性! 劇名都起得好好! O岩O岩先發現, "沒有你之後" 係1989年出唱片, 仲有89年劇集"還我本色"插曲. (DERIC 在"還"劇做配角~), 但呢隻歌係90年先入選勁歌季選, 我估都係"我本"效應!

1990年勁歌金曲第三季季選結果

相逢何必曾相識 蔣志光,韋綺珊
戰勝心魔 BEYOND
失戀 草蜢
沒有你之後 溫兆倫
一千零一夜 李克勤
開心氣候 鍾鎮濤
夢中的你 張學友
諾言 葉蒨文
EVERYTHING 王靖雯
何必來得太晚 鄺美雲

講時講, 我依家開始睇埋"天涯俠醫", 因為舊年有睇過少少"律政新人王", 我幾鍾意林峰個樣(尤其係戴眼鏡果陣! 我對戴眼鏡, 尤其黑膠框果隻有種情意結! 不過古裝LOOK好唔OK)

因為唔想幾日冇寫, 搞到特登響11點9就INIT定~ 不過今日都係冇乜心機寫, 寫住咁多先.
由於唔得閒, 今日發既歌詞分享第三期將會延遲發行. (諗唔到講邊首添!, 不過其實可能MAILLIST果度D 人都唔睇呢度都未定! 我要重申, 分享詞作不設補寄, MISS左就MISS左, 人生總係有遺憾!)

黎緊仲有D "我本"感想, 遲D 再講!

星期二, 11月 16, 2004

"童年往事"之一

唉. 做錯野添! 真係"火羅"! 唔講呢D 先..

尋晚睇左曾江個女同寶珠姐個仔果套劇, 劇本OK啦... 最奇係我地個位竟然係EXACTLY寶珠姐後面! OH, 唔可以亂UP野!

講開友人J2, 佢同我有個共同識的人. 我估唔到果個人而家變到咁"manipulative"
好似邪教教主咁! 不過其實我覺得, 一個人要狠下心腸去做壞事發達, 其實係一D 都唔難! 不過響現實見到, 又係另一回事, 世途險惡, 一定要堅定意志!

J2問我有冇睇過張小嫻, 我就答我睇過連載過果D 囉. (我好細個就睇MP!
當年亦舒衛斯理全部有睇, 我懷疑因為咁我鍾意睇亦舒的小說) 佢同我講, 佢中學果陣睇張小嫻本書, 覺得書入面果個寫到好似林夕, 話個女人使唔使咁為個男人去寫本書??? 佢當年在學校想搵人講呢件事, 但冇人睇張小嫻亦冇人知林夕!? 唔係卦... 果陣林夕開始拎叱吒獎.. (唔小心暴露左年齡添!) 我同佢講, 咁我好彩D! 在MP睇到時, 我老豆阿媽都話呢個係寫林夕!
而同班亦有MP FANS, 大家亦都GET 到! (尤其係中學同學JC, 記得當年MP 星期日有詞評, 講"等你回來"寫得好好, 我仲記得同佢講息講呢樣野! 證明野係要講過先記得. 唔係我又點會記得當年睇過"我本善良"!?

因為睇到27集, 太SWISSWISS -> 廣告用語, 攪到當年無知的我亦都"春心蕩樣" -_-, 冇計, 要用呢個形容詞, 而返學校同人討論佢地有冇咩既時候, 冇人理我, 所以好記得!!!)

我地間學校盛產補習天后, 我地果屆有三個! 點解補習天后一地曬名牌???
(下次有機會要問下), 其中一位初中曾經同過班既天后, 幾期前接受一仔訪問時, 講d 野同當年我地miss講d 野一樣!
就係話 TEACHING IS ACTING! 當站在"台階"時, 就要演戲! MISS 仲講在英留學時, 唯一寄託係睇 SISTERS PICTORIAL! 我好有共鳴~ 因為我七歲屋企已經有得睇! 哈~
不過當年miss勁偏心, 我仲記得果年我讀得唔係好開心添! 響五年後佢教我地英文, 就唔同曬! 因為我英文叫班上ok! 我仲記得我問佢記得五年前好偏心咁唔like我. 諗返起都覺得自己問d 咁既野勁"ON NINE".... -__-

星期日, 11月 14, 2004

新四大天王???

尋日睇左演戲家族+香港舞蹈團的"邊城", 舞蹈團最近好似都幾多同DRAMA 的CROSSOVER.
之前"酸酸甜甜"都係..有PROFESSIONAL的舞蹈果然唔同, 不過今次唔知係咪隔得太遠,
好似感染力少左? 三年前首映時反而我最深刻印象係導演上黎謝幕時, 男主角飾演爺爺的陳曙曦先生, 一路係望住導演的, 而眼神, 就好似爺爺咁溫柔! 不過今次冇導演謝幕, 唔係我會再留意!

尋晚要返夜呀, 所以冇UPDATE到呢度. (不過我估冇乜咁多忠實讀者!~ 呵~)
買左1991年的"老友鬼鬼"VCD LU, 主題曲係溫兆倫"我是情痴" (其實同劇情冇乜關係)
記得套劇播果陣, 都好HIT架! (我估家下會出都係因為DICKY 多FANS?????)
因為DICKY響入面有"無厘頭"演出, 所以大HIT, 而溫兆倫仲傳不滿鋒頭被搶??
(不過"例牌否認"喎. 我都唔明... D 週刊見人否認就實話"例牌") O岩O岩睇左DISC 1,
冇乜印象... 我估呢套當時冇乜點睇.! 要提既係溫兆倫響呢套劇又係姓齊! 叫"齊亮聲"~

好啦, 要講下不知所謂的新四大天王, 首先最不知所謂既係搞呢個TERM出黎既校長.
四個裡面, 有兩個我唔會CRITICIZE, 因為佢地都係林夕既大米飯班主. 同埋佢地兩個比較真, 不過我都唔LIKE佢地既唱腔...

而另外兩個, 係許+李先生.. 首先... 佢地都... 四十歲啦卦?
家下先搞D 咁既"套裝人物"? (學金庸小說分析TERMS!) 尤其許, 我覺得"火羅"!
大家去睇下今期一仔... 訪問 -_-. 我覺得佢唔係為做好MUSIC.
年年年尾整隻搏拎獎歌出黎, (尤其係爛泥, 直頭係笑柄), 究竟有幾多人記得你
拎過咩獎? 定係會記得你有咩好歌????

而李先生, 同許心態基本上都係差唔多. EASON的加盟大會錄果段野都係咁上下, 唔想再講.

根本人地EASON都唔會理你有冇計"新四大天王", 起碼咁多隻碟有留低一D 人地好多年後都記得既好歌! 咁樣就夠啦!

星期五, 11月 12, 2004

恃老賣老????

大家去左 OLDBISCUIT未? 我仲有好多野想UP.. 大家要拎就快.

我好想寫第23集果段, 最尾浩男同伊明果段對話的表情. 不過我估我D 文筆好麻麻.
但係邵美琪真係演到果種, "完全招架唔到" 既感覺. 果D 鏡頭擺位好正!

仲有之前幾集, 齊浩男成個癲佬咁, 要追住佢果度 (都話天蠍乜都做得出...)
伊明話喊就喊, 勁! 遲D 要再SHARE埋23集尾果段先, 又係好正! (不過浩男OVERACT左)

頭先搭車果陣諗左好多野想寫, 返到黎又冇MOOD! 點算, 要諗返下.

尋日果集最尾同今集開頭都係王傑的"為何分離", 好正! 響"我本"播完之後亦係"水鄉危情"的主題曲.

睇返套劇, 唔搵都唔知原來羅樂林響佳視做過楊過! oh... 好難想像!

(好似當年好難想像點解搵古仔做楊過一樣.. 好彩金庸唔俾LEMON做... 咁...
會唔會俾王菲的新歡做?? 反正佢做過令狐大哥, 同靖哥哥, 唔爭在啦)

羅樂林同曾江幾多歲 (曾江個女今年先廿幾咋喎)?? 點解會做浩男老豆??

同埋, 當年D 劇, 真係後生仔擔綱, 齊浩男當年做主角演"城巿故事"時, 都係廿歲咋!
跟住仲勁, 原來林利出道係18歲, 拍"我本"時, 都係24歲! 仲後生過齊浩男!!

家下D 劇, 下下搵D 過四十 (或年近) 的男主角 (咁都算, 最弊要扮後生, 好似睇過集"流金歲月", 羅嘉良話自己廿幾歲!!, too bad~), 襯個三十幾的女主角...

係咪家下都唔會有D 十幾歲的後生仔立志做戲?? (因為冇左訓練班? 又或者要入演藝?)
有既咪係 twins 呀, BOYZ 果D 咁反智囉. oh. 又要講返明週上幾期話, 七十年代出生的人比六十年代人少左好多機會)

不過最差係... 八十年代果班可能仲慘. 十幾萬讀完張CERT出黎, 一個月搵幾千, 所以有乜辦法唔係日日唱K打機??
(好明顯我係老左好多! 竟然響度講D 咁既野! 都係唔講啦!)

明天要繼續, 講下不知所謂的"新四大天王".

星期四, 11月 11, 2004

版主事忙~

所以趕唔切十二點前留言添.
撞鬼... 響留言版明明想打'羅頌華'都變左'羅頌賢'搞到唔三唔四! -_- 枉我當年係半個亞記劇FANS (因我的好友佢屋企睇亞記)
仲記得當年張小嫻開始在MINGPAO寫文埘, 仲可以響吳雪文+江華果套"郎心如鐵"睇見張才女係編劇! 我覺得係明報一手捧紅佢既!
佢D 小說除左響明報連載果三本(即係頭三本), 我係冇買+冇睇過! 不過2001年有日打書釘睇佢新作時, 嚇窒左! 詳情我當時講左俾前同事知, 依家唔想再RECALL!!!

開始左學韓文的第一堂, 人老左果然對D 新鮮事物的好奇心都少左, 以前開始學日文果D 興奮感覺都冇左! OH NO!!! 一星期返三日學的日子將會維持一個月, 直至日文畢業. 不過韓文好似真係幾易學咁喎!

要講幾單關於我本善良的事:

1. 邵美琪前男友鄭伊健傳被阿SA暗戀. 唔係卦, 有乜咁好爭??

2. 溫兆倫前女友何美婷主演的"我係 tuna fi"將在亞記重播. 我都唔知點解咁記得佢主演呢部戲個戲名!?
因為我細個唔知"TUNA FI"係乜野! 同埋我不嬲都唔鍾意食SANDWICH (其實都唔啦更, 不過照講 :D)
(再補: 何美婷響亞記仲主演過Q表姐, 當年係搶左亞記嫡系關詠荷既主角位黎做! 而Q表姐的主題曲係柏安妮的|"懶洋洋的下午" -> 唔記得點唱, 舊年定前年亞記重播大姐明+米雪的皇家師姐亦係柏安妮的"騙我也要一世"做主題曲 -> 呢隻勁好聽)

3. 今期東地訪問SONIJA, 話同溫兆倫散左, 話佢冇以前咁細心.OH.我估SCORPION真係可以甚麼都做得出的. 包括刺傷你!!
(I am an astrology believer, don't argue with me!!!)

4. 原來曾江個女係前年我在hkapa睇的舞台劇有份做的. 佢做得真係幾好, 人又幾靚. 所以我已經搵左朋友J2, 幫我拎飛今個weekend
去睇佢同寶珠姐個仔做的 drama~ 不過曾小姐好似畢左業成年都唔見佢有DRAMA做, 我估在DRAMA界既失業情況都好嚴重? (純屬臆測!)

咁都可以UP到四單, 我都幾勁?!

星期二, 11月 09, 2004

嗚!!

嗚!!!! 今日竟然record唔到我本善良!!! 尋日兩部VCR開行左黎record, 今日就照正常用一部黎record啦, 竟然!!! 駁錯冇開果部落電腦!! (因我record VHS SIGNAL, 靚過TV SINAL少少) 但 record 開果部又唔記得熄機!!! 攪到預record唔到!!! 好想爆粗~ :~
冇心機寫野!!!

星期五, 11月 05, 2004

安然無恙!!!

好彩... 今日冇乜事lu. 如果唔係我會以為我俾老細嚇到我精神緊張... 冇理由架嘛, 我份人不嬲都冇乜壓力既... 真係好彩冇事!!!

講返我個歌詞分享maillist, 有人話我個網的只有作曲/作詞/編曲人而唔評論歌詞唔夠好. 點解要咁呢?

第一, 歌詞係作詞人既心血, 唔係我的嘛. 我只可以提供一個index去俾大家參考... (而且CASH話正式黎講post歌詞作website除左要俾$,仲要原作者同意先得), 我邊有咁多$$呀~ 有成二千三百幾首咁多~

第二, 我覺得尋找既樂趣真係好好~ 尤其係去搵舊cd呀, 黑膠呀, cassette呀, 搵舊書, 有時仲咁o岩無無聊夜猛猛睇無線戲, 見到credits roll到主題曲係林夕... 真係覺得好開心! 哈~ (追兇二十年主題曲就係咁樣俾我發現啦) 我又點可以剝奪大家呢個樂趣? (不過林夕在中國大陸/台灣都有不少fans, 呇a要搵林夕的廣東舊作就難d啦. 呢個亦都係我搞個maillist的原因)
其實以我用左幾個月既心血可以搵到咁既成果, 我相信有心係無難事的. 大家可以俾心機~ :D

星期四, 11月 04, 2004

心跳加速...

嗚.. 好辛苦. 自從尋晚成TEAM同老細食飯後 (佢強調呢個係一個JOB), 搭緊車已經覺得心跳加速好辛苦. 我要搵隻手去托住個心口先覺得好少少呀. 究竟我係食錯野定心理作用呀. 搞到我連學都唔返. 我好少走堂架!! (我讀緊"六年目"的日文啦~ 今年最後)

哈! 繼續講下"我本"先, 尋日果集, 李琳琳同邵美琪講"你上次訪問石叔係幾年前啦可", 好明顯係講錯左囉, 應該係"正叔"呀! 我見阿MAGGIE愕然, 但編導又唔嗌CUT. 一路ROLL落去, 唔係卦. 又唔係前幾日果集, 陳庭威同林楚麒撞左對白果場就話一TAKE過幾分鐘唔好叫佢地又由頭黎過又喊過就話即! 之前林利去林綺雯屋企, 林綺雯醉酒果度都有D 錯對白架~! D 編導好鬼懶...

今日都係唔講咁多, 因為要訓! 最後要講講, 我個"林夕歌詞分享"MAILLIST已經 RELEASE, 之前因為少人有興趣真係有D意興闌柵, 唔緊要啦, 少人就少啦~ 其實我在尋找佢的歌詞中已經得到唔少驚喜. 有D 更加係狂喜~ 機遇. 巧合. 遲D 有機會再分享啦.

星期三, 11月 03, 2004

開張大吉!~

識得我既人都知道我好多野講架啦~ 呢個日記應該會有兩個特色:

1. 用廣東話黎講野, 因為廣東話打落真係好盞鬼, 唔好叫我將佢白話化啦...

2. 唔會有任何工作既話題~ 就係咁.

今日開張大吉, 先要講兩件事, 第一就係上星期去睇詹瑞文, 林奕華的"大娛樂家".
老實講啦, 我唔係好like梁詠琪, 不過睇完, 都ok左既. 起碼唔會抗拒聽佢的歌.不過anyway我都無迷過華仔啦)
gigi仲周圍同人握手, 當左係演唱會??? 不過睇劇既觀眾好有品, 唔會爭出去同佢握架.
(定係佢d fans買晒樓上平飛位呀??) 果場仲有華仔起身同佢握手! 個劇ok啦, 似show多d.
咁人地都擺明話大娛樂家丫嘛. 我都係最鍾意林奕華果d呢, 懶multimedia有VIDEO果D~
唉. GIGI又同PONG NAM唱SANDY LAM的歌作懷舊. 其實舊年睇"馴情記"已經係咁.
馴情記好明顯D主角係同我同年, 佢地懷的係憶蓮. 但我始終只喜歡FAYE WONG.
我知我的朋友A, 朋友B又會話阿菲唱歌冇HEART呀. 我唔覺喎!!! 我估可能我聽歌得太遲啦.
我識起碼有幾個人都欣賞: 1. SANDY LAM+2. PRUDENCE LIEW+3. SHIRLEY KWAN
而唔LIKE FAYE WONG 既。 OK囉。 可能我真係因為太喜歡林夕,所以最愛是FAYE WONG啦。

第二呢. 就係我本善良真係好好睇呀. 其實整呢個diary有d都因為見到人地個diary寫得好盞鬼, 所以自己都想整返個.
咁我要quote返響人地guestbook留言的話先~

" 我想話﹐我仲記得14年前﹐當我仲係FORM 1 果陣﹐睇完第27集﹐阿浩男同伊明在英國間屋度﹐抱埋一齊然後鏡頭FADE OUT果度好有印象﹐因為我估佢地跟住會咩野。。然後第二日返到學校仲同同學討論(不過無人理我咁啦)﹐我前幾日睇返呢集覺得好感動同埋覺得自己變得好老餅﹗
仲有仲有﹐邵美琪問溫兆倫係咪肯定只係想見到佢一個﹐溫兆倫錫佢一啖﹐然後拎返轉頭﹐再合埋眼然後點頭﹐嘩簡直正到爆﹐直頭成為我後面十年對男仔的FANTASY。即係應該要咁架嘛。
不過呢套劇有D可挑剔既就係時間觀念有問題。都唔覺阿浩男坐監坐左四年。伊明一時同佢地已經識左五年(在船上同埋同阿李琳琳都係咁講)﹐ 但去到英國又變左“四年前XXX”。(咁我明因為外景係拍左先既﹐兜唔返)而尋日果集又到呀浩兒問家榮點解半年前唔搵返佢(唔係卦﹐佢地好似係浩男入獄冇幾耐就識喎)而阿蘇敏又同家姐講落左黎大半年。。。唉。我記時間記得好清楚架﹐所以冇辦法唔察覺。
仲有﹐我上星期唱K特登都唱左沒有你之後同我是情痴﹐當年溫兆倫仲要出外景拍架﹗(唔通娛樂唱片咁有$$﹖定溫兆倫真係好紅﹖﹖當年黎明好紅呀﹐所以就算溫兆倫好型都無用無乜FANS。)同埋唱埋草蜢的歲月燃燒﹐因為佢地重遇果集實在太好睇﹗﹗﹗不過佢地嘈交果集﹐有隻歌歌詞“若你想暫時使我 反省愛你有幾深”果集﹐我聽極都唔知邊個。我擺左去 http://www.linxism.com/part1.mp2 同埋 http://www.linxism.com/part2.mp2 邊個知道就話俾我知啦﹐我覺得好好聽呀~ 我本善良真係好好睇﹗"

遲D 仲有對呢套劇的野要講。!!!

就係咁啦. 我唔會賣呢個diary既廣告既. 有緣睇到既就睇啦~ 呵呵.
不過要賣下我個網站廣告: http://www.linxism.com (係我搜集林夕的詞作集~~~)